Siglir tar il cuntegn

Header

video
Il marsch da protest al WEF – il segund di
Or da Telesguard dals 20.01.2020.
laschar ir
cuntegn

Acziun da protest Marsch per il clima tras il Partenz – uss vegn il finale

Las manifestantas ed ils manifestants han finì lur segunda etappa – radund 21 kilometers da Schiers a Claustra.

Il mardi spetga l'ultima etappa fin a Tavau. Il marsch da protest n'ha dentant betg survegnì il permiss dad ir sin la via principala ed ha en sasez da sviar sin las sendas da viandar.

Cura che la gruppa da var 350 persunas è arrivada a Küblis hai dà in gentar vegan.

Da las 13:30 è il viadi lura ì vinavant fin a Claustra. Damai ch’igl era fitg fraid èn ils participants era vegnids creativs per sa stgaudar. Per exempel èn insaquants stads ensemen en in rudè – per chantar chanzuns nua ch’ins sto siglir e sa muventar vitiers.

Intgins prendan il tren fin Claustra

Cun quai ch'il marsch n'è betg propi simpel han intgins stuì prender il tren fin a Claustra. L'ultima notg era fraida ed ils demonstrants n'han betg durmì bler, sco els raquintan. Ils ins han durmì en salas da la plaiv a Schiers, auters en hallas u uschiglio insanua. Ma i saja organisà bain, din in pèr dals giuvenils.

La gruppa dals participants e da las participantas è fitg eterogena. Giuven e vegl – cun chaun u senza – cun satgados gronds u pigns – travestgids u betg – ruassaivels e da quels ch’èn fitg dad aut e chantan.

RTR, novitads 12:00++