Ulteriur Grischun - Ad alp, in spectacul - en il Partenz cun passa 10'000 visitaders

Il chaschiel e la charn gustan bain als visitaders dal spectacul d'alp a Seewis. «Savurus, ferm, delicat», aud'ins strusch ch'els han traguttì. Il chaschiel è da las alps en Partenz ed en autras regiuns dal Grischun. Quellas dal Partenz èn dentant «grondas alps en cumparegliaziun cun las alps en l'Engiadina ubain en Surselva», di Töni Gujan, il president dal comité d'organisaziun da l'«Alpspektakel».

Dentant possian ils purs da las alps en Partenz esser loschs da lur alps bain tgiradas. Il spectacul d'alp saja betg be per vender ils agens products, mabain er ina pajaglia per la lavur dals purs e signuns ed ina finiziun da la stad ad alp. Ed ils visitaders hajan qua la pussaivladad, da far ina pausa dal mintgadi.

Passa 10'000 visitaders

Ins spectatul è la festa propi, be schon pervi dal grond dumber da visitaders. Radund 10 000 persunas èn stadas la fin d'emna a Seewis. Plaschì ha cunzunt la gronda scargada da passa 50 vatgas e betg main nursas e chauras tras il vitg - biestga ornada cun tschupels da flurs. Er la tenda da festa cun programm da musica populara e jodel era plaina, las giassas cun ils stans da martgà bain visitadas ed il chastè da strom plain uffants.

Era qua cun tundida da las nursas

Ed er ina u l'autra chaussa ch'ins na vesa forsa betg mintga di è stada da vesair: In pur che tunda nursas, in pastur che fa ina show cun ses chaun, umens che laschan schluppar la giaischla, mats, buobs e umens che fan il «Hürnen». In gieu sumegliant al mazzaculla. La festa ha attratg giasts da dapertut - betg be dad autras regiuns dal chantun, er dad auters chantuns sco Berna u schizunt da l'exteriur, da l'Austria, da l'Engalterra e schizunt da l'Australia.

Actualitad la bunura 06:00