Siglir tar il cuntegn

Header

Miradura vid la lavur
Legenda: Emprendista da miradur a chaschun a chaschun dal champiunadi svizzer dals mastergns Swiss Skills a Berna. RTR, G. Hosang
cuntegn

Ulteriur Grischun Adina pli grev d’occupar plazzas d’emprendissadi

La Surselva è la regiun en il Grischun che ha actualmain las pli bleras plazzas d’emprendissadi ch’èn libras.

Ina pitschna retschertga da RTR tar la gastronomia, hotellaria e la branscha da construcziun mussa, ch’igl è cunzunt la depopulaziun che procura che la dumonda suenter plazzas d’emprendissadi è sa sminuida massivamain ils davos onns. Annalisa Giger dal Hotel Alpsu a Mustér deplorescha ch’ella n’ha betg pudì occupar la plazza. In problem en quest senn n’èsi dentant betg.

Giuvenils da citads na tschertgan betg gist lieus d'emprendissadi en nossas regiuns.
Autur: Fabia Caduffhoteliera

Ella ha simplamain engaschà students che vulan gudagnar in per daners durant la stad. Tenor Fabia Caduff dal Hotel Central a Sursaissa èsi uschia, ch’ella n’ha betg gì annunzias per las plazzas che correspundevan al giavisch. Tenor ella pudess dentant era la regiun perifera esser in problem. Giuvenils da citads na tschertgian betg gist lieus d’emprendissadi en questas regiuns.

Pli problematic en il sectur da construcziun

Tar la branscha da construcziun èsi a lunga vista in problem sch’ins na chatta betg emprendists, declera Guido Friberg da la firma Loretz SA a Sedrun. Per avair en il futur glieud qualifitgada per lur fatschentas ed era per il cader da questas, stoppian els pudair scolar nova glieud. Quai conferma era Daniel Blumenthal da la fatschenta da construcziun Valaulta Berni SA da Rueun, e president da l’Uniun d’impressaris da la Surselva.

Las fatschentas èn sezzas in pau la culpa.
Autur: Daniel Blumenthalpresident da l'Uniun d'impressaris Surselva

El è dentant era da l’opiniun, che las fatschentas sezzas hajan in pau la culpa che las plazzas d’emprendissadi en questa branscha n’èn betg uschè tschertgadas. I procuria per malsegirtad e na motiveschia betg gist da vulair emprender in dals mastergns en la branscha da bajegiar, sche las firmas communitgeschian adina mo ch'i stettia mal en la branscha e ch'ins stoppia relaschar collavuraturs. El è dentant persvas, che cun il mastergn da miradur han ins anc adina bleras pussaivladads da sa scolar vinavant, ed uschia era in bun avegnir en la Surselva.

Radund 600 plazzas betg occupadas

En il Grischun n'èn tenor indicaziuns dal Uffizi per la furmaziun professiunala actualmain enturn 600 plazzas d’emprendissadi betg occupadas. Passa 100 da questas èn en la regiun da la Surselva.

Artitgels legids il pli savens

Scrollar a sanestra Scrollar a dretga