Ils proxims trais fin quatter onns duain vegnir stgaffidas a Cuira 75 novas plazzas da lavur. Sco la citad communitgescha haja la firma tirolaisa Speed U Up fundà l'atun passà ensemen cun la Somedia AG in joint venture che sviluppescha tecnologias dal futur – tranter auter cun focus sin l'intelligenza artifiziala ed identificaziun da la vusch.
La finamira saja da digitalisar il turissem en regiuns da muntogna. Il chantun sustegnia quest project e l'uffizi per economia e turissem accumpognia el.