Sonda vers mezdi è in um da 57 onns collidà cun ina mattetta da 5 onns. L'um era sin la pista 5b en direcziun staziun da val. En in lieu nunsurvesaivel, davos in crest, era da medem temp ina mattetta da 5 onns sin pista. Il skiunz aveva percurschì memia tard l'uffant e n'ha betg pudì evitar ina collisiun, sco la Polizia chantunala scriva. Tras la collisiun è la mattetta vegnida bittada aval ed è sa fermada giudim la plaunca. Terzas persunas sco era il salvament da pista han dà emprim agid fin che la Rega è arrivada.
La Rega ha sgulà la mattetta cun grevas blessuras dal chau e dal pèz en l'Ospital chantunal a Cuira. L'um è sa blessà vi d'in bratsch e la Rega ha era sgulà quel en l'ospital.
RTR novitads 09:00