Siglir tar il cuntegn

Header

cuntegn

Ulteriur Grischun Arosa: Tschintg urs per quatter milliuns francs

Il nov da chasa dals urs duai esser in territori da 2,5 hectaras gist dasper la staziun mez da la pendiculara Weisshorn. L'idea d'in «pajais d'urs» ad Arosa ha il directur d'Arosa Turissem gia inizià avant sis onns. Uss è il project definitiv sin maisa.

Tant il project sco er il manaschi dal parc d'urs vegn finanzià nundeterminadamain da l'organisaziun Vier Pfoten e da dus donaturs privats. La vischnanca d'Arosa na porta nagin ristg finanzial. Las motivaziuns per il project èn dentant dal tuttafatg differentas. Als investurs vai en emprima lingia per la protecziun d'animals e da la natira. Al directur da turissem d'Arosa percunter vai per attrair dapli turists. En il project ad Arosa vegnan ils interess dad omaduas varts cumbinads.

Motivaziun protecziun d'animals

Il «pajais d'urs» duai porscher in nov da chasa per urs da circus, da saut u da cumbat ch'han vivì sut schlettas circumstanzas. Tenor il biolog dal zoo da Turitg Hans Schmid, ch'è in dals mainaproject, pajassan ils investurs er tut sch'il project vegniss realisà insanua tut auter or en la natira nua ch'i n'avess nagina glieud.

Motivaziun turistica

Arosa Turissem vul en emprima lingia attrair dapli giasts durant la stad. Enturn il territori duai dar sco en il zoo ina saiv da 3,20 meters. La glieud duai pudair guardar en il territori per exempel davent dal trutg che passa speravi u d'ina sort plattafurma. I duai dar tavlas d'infurmaziun sco er guidas per classas da scola e turists.

Las ideas dals turistichers van dentant anc bler pli lunsch. Els vesan en il «pajais d'urs» in grond potezial da marketing per la regiun. Las ideas tanschan da panins en furma d'urs fin tar ils urs sin il glatsch sco equipa da hockey l'enviern.

Intginas cifras :

  • quatter milliuns francs custa l'entir project
  • 320'000 francs custa il manaschi mintg'onn
  • 2,5 hectaras porschan plaz a tschintg urs
  • trais tgiraders d'animals guardan dals urs
  • ina saiv da 3,20 meters circumdat il territori
  • bunamain 100'000 giasts duain ils urs attrair mintga stad

Be leva critica ord la populaziun

A la preschentaziun dal project a chaschun da la radunanza generala d'Arosa Turissem èn ils resuns da la populaziun stads per gronda part positivs. Sulettamain la dumonda da la segirezza ha dà da discurrer in zic. Las saivs che vegnissan bajegiadas ad Arosa, sajan quella che vegnian gia duvradas decennis en ils zoos. Quellas sajan sa cumprovadas, uschia il biolog Hans Schmid.

audio
Bunura: Arosa – Project per in parc d'urs
ord Actualitad dals 21.09.2016.
laschar ir. Durada: 2 minutas 19 Secundas.

Sin la dumonda sch'ils urs dad Arosa pudessian attrair urs selvadis, ha Hans Schmid respundì che quai saja pussaivel. Dentant il pli grond problem na sajan en quest connex betg ils urs en il «pajais d'urs». Urs selavadis vegnian cunzunt attratgs da rument dals umans ch'è bain cuntanschibel. Plinavant na duai er betg dar pitschens urs ad Arosa.

Dus ulteriurs puncts ch'èn vegnids crititgads da singulas persunas: La purschida na duai betg esser gratuita. Plinavant sajan las cifras da bunamain 100'000 turists che duain vegnir mintga stad be pervì dals urs probablamain betg realisticas.

Ils d'Arosa voteschan ils 27 da november 2016 davart la midada da zona per il territori dasper la staziun da mez da la pendiculara – pia per u cunter ils urs.

RR actualitad 08:00

Artitgels legids il pli savens