Siglir tar il cuntegn

Ulteriur Grischun Aua da sur e da sut – il plaz Alexander a Cuira è inaugurà

Che la festa dad inauguraziun per la plazza Alexander la sonda a Cuira haja gist da far uschè bler cun aua, quai n’avevan ils organisaturs probabel betg giavischà. Da sur e da sut è l’aua vegnida. Sco plievgia da sur e da sut or da las tiblas da la nova funtauna siglinta entamez la plazza.

Malgrà la trid’aura èn tuttina insaquantas persunas vegnidas a festivar.

Uss sun jau schont fitg mirvegliusa, co la plazza è gartegiada suenter tantas midadas

Quai di ina visitadra da la festa d’inauguraziun da la plazza Alexander. Per part saja stà sgarschaivel, insumma betg bel, la plazza Alexander. Uss dentant, uss saja vegnì fitg bel, agiunta ella.

In um, ch’è gist vi dad examinar il nov bigl cun tiblas, è er cuntent cun la nova plazza, bain, i saja vegni detg bel. Sia dunna di:

Ed ils uffants han segir er plaschair da quest bigl

Propi, ils uffants na pon betg spetgar sin la bell’aura. «Jetzt kum usa do, es regnet und isch kalt», ston las mammas clamar suenter als pitschens durant che lezs provan or tge che capita sch’els stattan sin ina da las tiblas u sch’els pon currer e siglir tras e tranter ils radis d’aua senza laschar tutgar.

Mühlbach sutterran
Legenda: Danunder vegn tuttenina quest platschergnar? Ina mamma declera a ses uffants ch’il Mühlbach traversa sutterran la via da la posta. RTR, S. Bundi

Nov bigl da baiver

Sper il bigl da tiblas hai era dà in nov bigl da baiver. E quel stat entamez in nov tumbin che mussa il Mühlbach. «Quai è bel ch’ins auda puspe il Mühlbach», di ina dunna a sia collega. Schont dapi probablamain 800 onns va il Mühlbach, il canal industrial artifizial, amez tras la citad, amez tras la via da la posta. Oz per gronda part sutterran. «Dentant quai na sa quasi nagin, er blers da Cuira na san betg quai.»

Tom Leibundgut baiva aua
Legenda: Cusseglier da la citad Tom Leibundgut lascha gustar l’aua dal nov bigl sin la plazza Alexander. RTR, S. Bundi

Pled d'inauguraziun dal cusseglier da la citad Tom Leibundgut

Auters visitaders èn probabel er vegnids per tadlar il pled d’inauguraziun dal cusseglier da la citad Tom Leibundgut. Quel ha fatg curt. Engrazià a la firma Straub che ha finanzià il bigl, engrazià als pajataglias che han pussibilità la renovaziun e suttastritgà las attracziuns da la nova plazza. In gieu d’aua per ils uffants, cultura per ils interessads cun las flurs lotus da Not Vital e da nov er dapli spazi per baiver in café.

Dapli spazi per baiver in café

In café avant la porta dad Alexander Kuoni (1842-1888), impressari, architect emprestanum da la plazza Alexander. El ha construi l’onn 1870 la via Alexander sin agens custs ed ha bajegià tar la cruschada cun la via Otto sia chasa dad abitar. Quella è dentant vegnida remplazzada l’onn 1982 tras in nov bajetg.

plazza alexander
Legenda: Festa d’inauguraziun malrgrà la trid’aura – co che la nova plazza Alexander vesa or senza la festa, ils stans e la musica ves’ins davent da damaun. RTR, S. Bundi

Zona bain visitada

Anc auters èn vegnids a visitar ils numerus stans, ils quizs, gieus e las preschentaziuns. Tut quai ha procurà persuenter, che la nova zona da scuntrada «City» da la citad è propi stada ina zona bain visitada, uschia ch’ins n’ha per part gnanc propi vesì co che la nova plazza vesa or – senza la festa.