Filiens, scorpiuns, millipes gigantics, mantas religiusas (Gottesanbeterin) ed auters insects èn grusigs - els èn monsters pitschens cun bler memia bleras chommas ed egls, zangas e piz! Na, per ils blers visitaders da l'exposiziun viandanta «insectophobia» a Cuira èn ils filiens ed insects vaira fascinants, ed er «fich interessants», di ina dunna. Tuttina, in u l'auter visitader ha schon vesì in animal plitost maltgiert. «Il millipes nair n'è betg in bel», di per exempel in buobet. Ina giuvna ha plitost tema dals filiens: «Quels han per mai memia bleras chommas e semovan er memia svelt».
Pli auter che in animal vesa or, pli gronda la tema
Che bleras persunas han tema ubain disgust da filiens haja probablamain er da far cun quai, ch'els n'enconuschian betg bain ils animals. E cun quai, ch'els hajan imità la tema schon dals geniturs. Er l'exponenta e «mamma» dals filiens Aileen Neigert ha ina declaraziun per l'arachnophobia: «Falians vesan simplamain or fitch different e quai cloma en memoria ina tema fundamentala». Ed er las teorias actualas sustegnan quai - pli different ch'in animal vesa or dad in carstgaun, e pli gronda che nossa tema da quai animal è. Tar ils filiens vegn vitiers ch'els pon esser da tissi - e quai fa er tema als carstgauns.
L'exposiziun è stada in succes. Ils pitschens «monsters» han pudì carmalar blera glieud en la Halla da la citad da Cuira.