«Il mund brischa»
Cun quests pleds clers ha la presidenta da la Confederaziun Simonetta Sommaruga cumenzà ses pled d'avertura dal 50avel Forum mundial d'economia. Da l'Amazonas fin en l'Australia dettia incendis ed ils effects per l'uman sajan desastrus. L'equiliber ecologic vegnia mess sutsura e quai haja er consequenzas gravantas.
La biodiversitad saja sco la tur d'Eiffel a Paris. Sch'ins allontaneschia mintga di ina struba da la tur, capitia l'emprim anc nagut. Baud ni tard dettia dentant l'entira tur ensemen, uschia Sommaruga. Gist tuttina saja quai en la natira. Lezza sa chattia il mument en in stadi critic.
«Stadi catastrofal»
Il mund sa chattia en in stadi catastrofal, ha ditg Klaus Schwab avant la presidenta svizra. Il fundatur dal Forum mundial d'economia ha ditg che la fanestra per agir sa serria gia. «Nus vulain schliaziuns per la midada dal clima», uschia Schwab, pertge a la proxima generaziun na dastg'ins betg laschar enavos in ambient adina pli ostil u adversari.
Schwab ha accentuà la responsabladad sociala dal forum. A Tavau haja el vulì stgaffir in «vitg global» ed uss saja el losch sin la cuminanza ch'el haja stgaffì en il «vitg muntagnard grischun».
RTR novitads 12:00
