Bajetg da hightec per la Hamilton a Domat

La Hamilton Ems AG dastga bajegiar sia nova fabrica sin l'areal vegl da la resgia gronda a Domat. Quai ha la populaziun da Domat decis cun in cler gea da 2'443 cunter 361 vuschs.

L'areal da la resgia a Domat. Bild in Lightbox öffnen.

Legenda da maletgs: La via è libra per il nov center logistic da la Hamilton. Keystone

Da quella decisiun dal suveran da Domat n'ha betg mo la presidenta communala Beatrice Baselgia plaschair, mabain era il schef da la Hamilton, Andreas Wieland. El saja fitg engraziaivel a la populaziun da Domat, sco el ha ditg sin dumonda.

Center logistic, localitad da producziun ed administraziun

Il matg vul el gia entschaiver a bajegiar - dentant betg ina fabrica usitada, mabain in bajetg da hightec.

En il bajetg vegni a dar in center da logistica per la Hamilton. Ulteriur da quai ademplescha il nov bajetg er la funcziun da localitad da producziun e d’administraziun.

La fasa da bajegiar cuzza in onn, uschia che la Hamilton Ems AG po cumenzar cun sia producziun il matg 2017.

Eventualmain engrondir la fabrica pli tard

Sper l’areal da construcziun ha la Hamilton anc reservà per ils proxims tschintg onns ina parcella da bunamain ina hectara per pudair engrondir la fabrica, sche quai fa basegn. Schebain il plan va en vigur u betg, vegn decis en il decurs dals proxims tschintg onns.