Siglir tar il cuntegn

Ulteriur Grischun Barcuns da lain betg obligatorics en la citad veglia da Cuira

Ils possessurs d'ina chasa en la citad veglia da Cuira pon stgirentar lur abitaziuns cun barcuns d’aluminium, e na ston betg montar barcuns da lain. Quai ha decidì il Tribunal federal a Losanna.

Ina chasa cun barcuns verds
Legenda: Ils barcuns verds che procuran per chaus cotschens a la Reichsgasse a Cuira. RTR, Alexi Baselgia

La citad da Cuira e la Tgira da monuments chantunala avessan vesì gugent, ch'ils possessurs avessan remplazzà ils 39 barcuns verds cun da quels da lain. Tenor il cusseglier da la citad Tom Leibundgut valian en la citad veglia prescripziuns pli severas per la sanaziun d'edifizis.

I va per evitar in Disneyland nua che tut è mo pli artificial.
Autur: Tom LeibundgutCusseglier da la citad da Cuira

Il Tribunal federal ha ussa dentant valità ils arguments dals proprietaris pli aut, e sustegnì ina decisiun da la Dretgira administrativa dal Grischun.

Chasa n'è betg protegida

La chasa dispitaivla sa chatta bain gist dasper la chasa da la regenza en la citad veglia da Cuira. L'object sez n'è dentant betg in edifizi istoric, e betg taxà sco degn da vegnir protegì.

En pli saja la differenza tranter ils barcuns da lain e d’aluminium a curta distanza strusch da vesair, ed ils barcuns da lain sajan 20’000 francs pli chars. Plinavant saja il mantegniment da barcuns d’aluminium bler pli simpel.

Nus essan satisfatgs che tuttas duas dertgiras han surpiglià nossa argumentaziun.
Autur: Josch BrunoldIn dals possessurs da la chasa

RR novitads 12:00