Actualmain ha la firma dus lieus da producziun: 30 emploiads da la «BC Tech» lavuran a Cuira e 30 emploiads da la firma «Rätia Mechanik» lavuran a Domat. Questa firma ha Christian Bargähr cumprà l'entschatta da l'onn ed uss dovria el dapli plaz ed in lieu communabel per tut ils collavuraturs.
«Domat è ideal per firmas da high-tech»
I va per circa 9'000 meters quadrat sin l'areal da l'anteriura resgia gronda a Domat. Quai è circa la medema surfatscha sco la firma Hamilton posseda – enfin ussa la suletta firma ch'è sa chasada en la zona d'industria Vial a Domat.
Sper la pussaivladad da collavurar e nizzegiar sinergias, menziuna Christian Bargähr anc in motiv che pleda per Domat: El veglia cumprar terren e betg be avair il dretg da bajegiar, sco quai ch'i fiss pussaivel a Cuira.
Atgnamain era previs a Domat in dretg da bajegiar per questa part da l'areal. La suprastanza da la vischnanca burgaisa saja dentant pronta da vender il terren, ha ditg il president Theo Haas sin dumonda. La radunanza decida ils 26 d'october en chaussa.
Era la regenza grischuna sto anc dar glisch verda. Quai ha il schef da l'uffizi d'economia dal Grischun, Eugen Arpagaus, accentuà envers RTR.
Il president communal da Domat, Erich Kohler, è optimistic che la firma n'haja betg mo interess, mabain ch'ella realiseschia lura era ses plans. L'areal saja pront per novs bajetgs e d'ina nova firma profitassia natiralmain era la vischnanca, per exempel cun novas plazzas da lavur ed entradas da taglia.
In bajetg sumegliant a quel da la Hamilton
Malgrà ch'ils contracts n'èn anc betg suttascrits, ha Christian Bargähr plans concrets: El vul bajegiar ina fabrica sumeglianta a quella da la Hamilton – simplamain pli pitschna. Las investiziuns muntian a circa 10 milliuns francs ed el veglia retrair las localitads il mars 2020 sche tut giaja tenor plan. Lura festivescha la firma «BC-Tech» numnadamain ses giubileum da 25 onns.
RR actualitad 06:00
