Siglir tar il cuntegn

Header

cuntegn

Betg dapli che 50 persunas Cuira restrenscha dumber da persunas en bars e clubs

A partir da proxima fin d'emna dastgan bars e clubs en la citad da Cuira betg pli laschar entrar dapli che 50 persunas. Ustarias e restaurants n'èn betg pertutgads da quellas mesiras pli severas.

Suenter che la citad da Cuira ha decidì l'emna passada da scumandar occurenzas cun dapli che 50 persunas restrenscha ella uss er il dumber da persunas en bars e clubs. Sco Urs Marti, il president da la citad ha ditg, stoppian er possessurs da bars e clubs sa tegnair vid la clausula da 50 persunas.

Nus lain simplamain evitar in virivari da persunas sin pitschen spazi. Perquai ston er bars e clubs restrenscher il dumber da persunas.
Autur: Urs MartiPresident citad da Cuira

Ins saja stà quest'emna en contact cun possessurs e gestiunaris da bars e clubs ed haja declerà la situaziun, ha ditg Marti. I giaja dentant betg auter che da restrenscher il dumber da persunas sin 50. Be uschia hajan ins ina schanza da constatar danunder ch'in virus vegnia, en cas ch'i dettia in'infecziun. La finamira da la citad saja d'evitar cas da corona a Cuira cun las mesiras actualas.

Restaurants ed ustarias n'èn betg pertutgads

Menaschis da gastronomia sco restaurants ed ustarias na stoppian betg sa tegnair vid il dumber da 50 persunas. Urs Marti argumentescha uschia ch'ins haja en in'ustaria dapli spazi tranter las persunas. En in club u ina bar nua che la glieud sautia sajan tuts fitg stretg in sin l'auter.

RR novitads 21:00