Siglir tar il cuntegn

Ulteriur Grischun Bogn cuvert da Zezras duai vegnir sanà

Oz decida la radunanza communala davart in credit da 6 milliuns francs per la sanaziun dal bogn cuvert a Zizers.

La vischnanca da Zezras.
Legenda: La vischnanca da Zezras. RTR

Il bogn construì l’onn 1972 correspundia betg pli al stan actual da la igiena e da la tecnica, ha ditg Peter Lang, il president communal da Zizers. La vischnanca haja ina liquiditad da 8 milliuns francs, uschia na saja la finanziaziun nagin in problem. In augment dal pe da taglia da 90% na saja betg planisà.

Nagins viadis a Cuira

In avantatg d’avair il bogn cuvert el vitg saja, ch'ils uffants stoppian betg ir a Cuira per emprender da nudar, ha Peter Lang ditg a Radiotelevisiun Svizra Rumantscha. Vinavant van las classas da Zezras ina lecziun l’emna a nudar.

Custs era senza bogn

Sch'il bogn vegniss serrà, duvrassi in’ulteriura halla da gimnastica per cumpensar quellas lecziuns. Ils custs da la sanaziun dal bogn cuvert sajan raschunaivels e l’avantatg gronds, ha ditg Peter Lang.