En il bajetg nov dal Museum d'art a Cuira hai brischà il mardi da mezdi. Curt avant las 13:00 ha la polizia chantunala survegnì il messadi da l'incendi. Vers las 13:00 èsi stà da vesair ferm fim che vegniva or dal bajetg.
Incendi davos da la fatschada
Sco Roman Rüegg, il pledader da la polizia chantunala ha confermà, eran ils pumpiers en acziun cun 50 persunas. Rüegg ha confermà che la fatschada dal bajetg nov ha brischà.
Suenter radund 20 minutas han ils pumpiers da Cuira gì stizzà il fieu. La Grabenstrasse è stada serrada durant radund in'ura. Naginas persunas èn sa blessadas.
Tge material ha insumma ars?
Markus Dünner, l'architect chantunal dal Grischun, ha dà resposta a questa dumonda:
«Il material che ha ars ha num Polystyrol. Quel ha blers avantatgs, po dentant cumenzar ad arder a partir da 400 grads.
Da tscherner quest material n’è dentant betg stà in sbagl ed era tar la fabricaziun è tut vegnì fatg dretg. Quai confermà era la controlla da la polizia da fieu.»
Preparativas per avertura cuntinueschan
Sco l'Uffizi chantunal da construcziun auta scriva, n'hai dà nagins donns en l'intern dal museum. Ed er las ovras d'art èn mitschadas cun la tema. Il motiv la l'incendi n'è però anc adina betg sclerì.
Il nov bajetg dal Museum d'art duai vegnir inaugurà il zercladur, las preparativas cuntinueschan. L'avertura è dentant dependenta da las lavurs da reparaziun e dal scleriment dal motiv da l'incendi, uschia l'uffizi. En duas emnas duain lura suandar dapli infurmaziunRR novitads 14:00 / 17:00 / 23.03.2016, 12:00