Siglir tar il cuntegn
cuntegn

Ulteriur Grischun Cartel – schleppa per la HEW SA avant dretgira

Il Tribunal administrativ federal ha decidì che la Weko dastga interrogar ina perditga dal cartel da construcziun. Uschia po la Weko tut tenor duvrar las explicaziuns d'in anteriur collavuratur pensiunà da la HEW SA cun sedia a Cuira.

Legenda: Tadlar il audio Bunura: WEKO e la sentenzia dal Tribunal administrativ federal. Durada 01:34 minutas.
01:34 min, Actualitad dals 28.09.2018.

Concret vul la Cumissiun da concurrenza (Weko) interrogar in anteriur collavuratur da la HEW SA cun sedia a Cuira sco perditga, per survegnir dapli infurmaziuns davart cunvegnas illegalas.

Quai n'è però betg en l'interess da la firma, uschia che quella ha fatg recurs – cun l'argument ch'il collavuratur pensiunà stoppia vegnir interrogà sco represchentant da la firma e betg sco perditga d'ordaifer. Uschia pudess la firma numnadamain sa referir sin ses dretg da na dir nagut en chaussa, ed evitar ch'il collavuratur di insatge.

Perditga d'ordaifer u represchentant da la firma?

Sco perditga d'ordaifer è il collavuratur liber da dir quai ch'el sa e vul. Quai pudess purtar dischavantatgs considerabels per la firma en l'entir process enturn il cartel en la branscha da construcziun grischuna.

Il Tribunal administrativ federal ha uss decis che la Weko dastga interrogar l'anteriur collavuratur sco perditga. El fa però er attent che la Weko na dastga betg simplamain far tuttas sorts da dumondas ad ina tala perditga. Tgeninas ch'èn lubidas e tgeninas betg è da sclerir tar mintga cas individualmain. Tut tenor po la Weko lura duvrar u betg duvrar las explicaziuns da talas perditgas entaifer l'entir process.

Be ina resposta sin ina «tranterdumonda»

Sco ch'il directur da la Weko Patrik Ducrey ha ditg sin dumonda a RTR, saja la sentenzia per els be ina resposta sin ina «tranterdumonda». Els stoppian uss sclerir, sch'els veglian insumma interrogar talas perditgas u betg.

Pertge cun questas resalvas na possian els tut tenor gnanc duvrar las explicaziuns en l'entir process davart il cartel da construcziun. Plinavant spetgan els er anc, sche la HEW SA accepta la sentenzia dal Tribunal federal administrativ a S. Gagl u sch'ella va enavant tar il Tribunal federal a Losanna.

RR novitads 12:00