Tenor Ramon Benker, president da l’uniun da commerzi «Altstadt Chur», saja il center Capricorn ina schanza per la citad veglia. El na craja betg che tut ils clients restian mo a la staziun.
Mintgin ch’ha success porta ina part da quel success er a tut la citad.
L’idea da far midada en il nov center hajan diversas butias en citad veglia gì. Il president da l’uniun na sa dentant da nagin che va propi. A la fin saja quai ina dumonda dal pretsch. Era en la citad veglia na sajan ils fits betg propi bass, enturn la staziun vegnian quels ad esser anc pli auts.
Construcziun è tenor plan
Il center Capricorn a Cuira duess avrir sias portas il december da quest onn. Bunamain 60 milliuns francs ha la segiranza AXA, il patrun da construcziun, investì en quest center. Sin 6’000 meters quadrat dettia ina surfatscha da vendita, quatter biros e 42 abitaziuns. Per il mument saja 70% da la surfatscha gia dada a fit, ulteriurs interessents sajan denturn – hai num sin dumonda.
RR actualitad 11:45