Siglir tar il cuntegn
Inhalt

Ulteriur Grischun Center d'asil Plankis a Cuira è serrà

Ils ultims 14 requirents d’asil hajan ins transferì mardi en il center d’asil Rustico a Laax. Quai ha Georg Carl da l’Uffizi da migraziun dal Grischun confermà sin dumonda dad RTR.

Ils letgs en il center per requirents d'asil Plankis.
Legenda: Ils letgs dal center per requirents d'asil Plankis èn ussa vits. RTR, G. M. Maissen

Cuira e Tavau sco localitads da reserva

Il chantun aveva prendì a tschains las localitads da la protecziun civila be temporarmain da la citad da Cuira per dar dumogn a l’unda da requirents d’asil. Ussa - suenter 5 mais - saja il center Rustico a Laax pront ed i na dovria betg pli las localitads a Cuira. Quellas salva il chantun dentant sco reserva en cas ch’ina ulteriura unda da fugitivs cuntanscha il Grischun. Medemamain vit è actualmain il center d’asil Schiabach a Tavau – era quellas localitads tegn il chantun sco reserva.

Manaschi nunproblematic a Cuira

Era sch'ils abitants en il quartier dal center d'asil Plankis eran sceptics il cumenzament, n'haja quai dà nagins problems e naginas reclamaziuns durant ils ultims 5 mais. Quai conferman Georg Carl da l'uffizi da migraziun dal Grischun sco era il president da la citad da Curia Urs Marti. Ina gruppa d’accumpagnament haja adina puspè infurmà e quietà la populaziun. Quai saja stà la clav per il manaschi nunproblematic.

Vinavant tschertgà: Center d'asil chantunal

Las evaluaziuns per in nov center d'asil en il Grischun sajan en la fasa finala, ha Georg Carl confermà. Nua che quest center vegn e cura, gliez decidia la regenza grischuna proximamain.