L’uschenumnà «Center da chors» as chatta en il quartier City West, en vischinanza dals dus sgrattatschiels. Sin var 1'000 meters quadrat duain surtut chors da Cuira filar vid lur melodias. Tenor Christian Klucker saja l'interess grond. Intgins chors da Cuira fetschian schon regularmain exercizis en ils locals.
Chantar e sa barattar
L'idea davos il «Center da chors» n'è betg mo da porscher locals da prova. Ils chors duain er sa barattar or. Trais chors pon far provas il medem mument. Suenter na duain els dentant betg ir a chasa, dentant seser en ils locals communals e sa barattar or. Quai duai, tenor Christian Klucker, inspirar a novas producziuns.
Mo cun ils chors da Cuira fissan ils locals dentant savens vids. Uschia duain er chors da la Svizra u perfin internaziunals chattar lur via a Cuira. Quai possian ins numnar «turissem da chors», manegia Christian Klucker.
4'000 francs mintga mais
Ils locals sa chattan en il quartier City West. Cun ses 1'000 meters quadrat n'è la surfatscha betg pitschna. Custs da locaziun na stoppia la «Singstadt Chur» dentant betg pajar al possessur, els stoppian mo pajar forza electrica, aua ed uschia vinavant. Quai sajan tuttina var 4'000 francs mintga mais. Quels pajan ils chors, ch'exerciteschan en ils locals, sco er sponsurs privats.