Siglir tar il cuntegn

Header

audio
Center da cumpra Steinbock: bilantscha locataris
Or da Actualitad dals 22.05.2020.
laschar ir. Durada: 02:11 minutas.
cuntegn

Center da cumpra «Steinbock» In cumenzament turbulent, ma er in cumenzament cuntentaivel

Il center da cumpra «Steinbock» è pir averts dapi tschintg mais. Dapi lura èsi stà in temp temp turbulent. Las stizuns èn dentant cuntentas cun la fatschenta. Il mument èn las bleras stizuns serradas, pervi d'in donn d'aua. Cura che tuttas avran puspè n'è betg cler.

I saja stà tschintg mais turbulents, di Daniel Kohler, president dal cussegl d'administraziun da «Pur Suisse». Mo tuttina saja el, tut en tut, cuntent cun il temp en il center da cumpra «Steinbock».

L'entschatta saja stada fulminanta, il schaner haja dà ina tscherta rusna, ma suenter saja il svilup puspè stà bun. Quai fin che la crisa da corona haja cumenzà.

«Pur Suisse»

L'interpresa maina en il center da cumpra in bistro e plinavant ina stizun cun spezialitads regiunalas, in'uschenumnà martgà da consum.

Il detaglist «Coop» è cuntent cun ils emprims mais en il nov lieu. I dovria bain in zic temp avant ch'in nov lieu vegnia acceptà da la populaziun, ha «Coop» scrit ad RTR. Mo malgrà ch'i ha datiers ulteriuras filialas, giaja la fatschenta bain.

«Coop»

La filiala en il center da cumpra è averta set dis ad emna. Gist dasperas maina «Coop» anc in «Pronto» ed en il center da cumpra Quader è da chattar in ulteriura filiala da «Coop».

Il chocolatier «Läderach» n'ha betg mo gì da cumbatter cun corona ed il donn d'aua, mabain er cunter odurs durant ils emprims mais d'avertura. Pervia dal ferm fried d'ina stizun dasperas, savurava e gustava la tschigulatta suenter savun. Perquai è la stizun er stada serrada singuls dis. Tenor Elyne Hager, pledadra da medias da «Läderach», marschia la fatschenta dentant, tut en tut, meglier ch'en il vegl lieu a Cuira.

«Läderach»

Avant che «Läderach» è vegnì en il center da cumpra «Steinbock», era il chocolatier da chattar a Cuira en la via Quader. Quai en il center da cumpra «City Shop».