Siglir tar il cuntegn

Ulteriur Grischun Center da prestaziun naziunal d'unihockey a Landquart

Avant bun in onn e mez n'ha Curia vulì savair nagut da novs stabiliments da sport ed uschia er ditg na ad in center da prestaziun naziunal da Swissunihockey. Curt suenter ha Landquart mussà interess da surpigliar il center da prestaziun ed ha elavurà in project.

Dus giugaders d'unihockey en acziun.
Legenda: Il 2017 duai il pievel lura decider schebain i dat ina nova halla da gimnastica cun center da prestaziun naziunal d'unihockey u betg. Keystone

Punct da partenza per il project d'ina nova halla da gimnastica a Landquart era dentant in'iniziativa da las uniuns da sport localas d'avant 3 onns. Quella pretenda ina nova halla da trais parts ed ils basegns da las scolas che han adina dapli uffants.

Il project da la vischnanca ha lura sveglià l'interess da Swissunihockey che vuleva en mintga cas realisar in center da prestaziun en il Grischun. Dapi l'avust è l'engaschi da Swissunihockey tar il project a Landquart fix. Quai porta d'ina vart in avantatg finanzial ma er cundiziuns ch'igl è d'ademplir.

Swissunihockey pretenda:

  • pussaivladad da trenar almain 10 fin d'emnas ad onn
  • hotels per star sur notg
  • plaz per 2500 aspectaturs
  • locals da teoria e per deponer material

Vischnanca tschertga investider privat

Ils custs per las pretensiuns da Swissunihockey ed in zic dapli surpiglia l'Uffizi federal per il sport. Per il rest vul la vischnanca chattar in investider privat, sco quai ch'il president communal Sepp Föhn ha ditg envers RTR. La vischnanca vul suenter prender a fit la gronda part da la halla e porscher las localitads a las uniuns per in pretsch modest. I na duaja perquai er betg dar in object da luxus, uschia Föhn vinavant. Anc saja la nova halla a Landquart in project grop ed i dettia anc bler da far.

Suveran decida il 2017

Il project definitiv è previs per la fin 2016. L'entschatta 2017 duai il pievel lura decider schebain i dat ina nova halla da gimnastica cun center da prestaziun naziunal d'unihockey a Landquart u betg.