Center da requirents d'asil a Litzirüti è quasi pront
- Mardi, 2.2.2016, 6:54, actualisà a las 9:23
Mez favrer avra il nov center per requirents d'asil a Litzirüti. Actualmain èn ils mastergnants anc londervi da far or da l'anteriura chasa da vacanzas in center da transit.
-
Gist a l’entschatta dal vitg Litzirüti stat l’anteriura chasa da vacanzas ed il nov center da transit per requirents d’asil. RTR, S. Bundi
1/5 -
Ina chombra per 4 persunas: sper ils letgs èn anc ina frestgera, ina stgaffa ed aua currenta en la stanza. RTR, S. Bundi
2/5 -
Quasi pront per l’instrucziun: en quella stanza pon ils requirents emprender tudestg. RTR, S. Bundi
3/5 -
I mancan be pli las plattas da cuschinar: la cuschina dal center da transit a Litzirüti. RTR, S. Bundi
4/5 -
Requirents pon era lavurar: Plirs requirents d’asil dal «Rustico» a Laax han pudì ir a sa gidar. RTR, S. Bundi
5/5
Chasas da vacanzas sco quella a Litzirüti ni er hotels ni chasas da personal sajan idealas per midar en in center da transit, cunquai ch'ins stoppi far qua las pli paucas midadas, di Georg Carl, manader da la partiziun asil da l'Uffizi grischun per migraziun. Il pli saja be d’adattar il mobigliar, las installaziuns tecnicas e la protecziun encunter incendis. Investì en la renovaziun ha il chantun radund 400’000 francs.
Georg Carl maina in zic tras il plazzal da lavur e mussa, sco la chasa da vacanzas vegn renovada. Las chombras da durmir per exempel èn tranter 14 e 16 meters quadrat grondas, han quatter letgs, ina frestgera, ina stgaffa ed aua currenta.
Impurtant saja er, che las chasas hajan avunda ulteriuras stanzas da differenta grondezza per pudair adattar ellas al basegn dals requirents. Il chantun na sappia numnadamain betg sch'i vegnan bleras famiglias cun uffants, ubain plitost giuvenils minorens senza accumpagnament. En tut duai il nov center avair plazza per 100 persunas.
-
1 Bunura: Litzirüti I - avant l'avertura 5:57 min
-
2 Bunura: Litzirüti II - fugitivs en GR 2:18 min
Las ultimas emnas sajan stadas in zic pli ruassaivlas en l'uffizi da migraziun. I n'haja betg dà uschè blers requirents d'asil sco la stad passada. Carl quinta dentant, ch'il dumber s'augmentia puspè en il decurs da la primavaira. Perquai è l'uffizi er vinavant a la tschertga da novs centers. Sper Mustér e Trimmis quinta el anc cun dus ulteriurs novs centers en il Grischun per il 2016. Nua che quels vegnan ad esser, na sa Carl dentant anc betg.
Totalmain èn 1121 requirents d'asil vegnì l'onn passà en il Grischun. Quai è dapi la guerra dal Cosovo l'onn 1998 e 1999 per bler il pli grond dumber da requirents dals ultims onns.