Centrala da dunnas perda sustegn federal

Pervia da novas prioritads en il rom da la lescha d'egualitad survegn la Centrala da dunnas a Cuira successivamain damain daners da la Confederaziun - ina gronda frida, di la manadra.

Catrin Räber, la manadra da la centrala da dunnas a Cuira, spera sin l'agid dal chantun. Bild in Lightbox öffnen.

Legenda da maletgs: Catrin Räber, la manadra da la Centrala da dunnas a Cuira, spera sin l'agid dal chantun. RTR, Sabrina Bundi

Rinforzar la cumpatibilitad da famiglia e professiun sco er l'integraziun da dunnas en la vita professiunala - quai è da nov il focus da la Confederaziun per reparter daners da sustegn tenor la lescha d'egualitad. Pia betg pli sco enfin uss cun sustegnair singulas cussegliaziuns per dunnas.

Quai munta per la Centrala da dunnas a Cuira, ch'ella perda ina da sias impurtantas pitgas da lavur. Las cussegliaziuns da lavur e professiun che cumpiglian per exempel cussegliaziuns pertutgant dretg da lavur, inegualitad da paja, mulestas sexualas ubain er mobing. Tranter 120 e 150 cussegliaziuns ha la centrala fatg per onn sin quest sectur. Autras cussegliaziuns da la Centrala da dunnas èn quellas da budget, d'aliments ubain da dretg en general.

Sperar sin l'agid dal chantun

Catrin Räber, la manadra da la Centrala da dunnas spera, ch'il chantun surprendia forsa ils custs che resultan. Sco quai che cusseglier guvernativ Martin Jäger di dentant, na giaja quai betg. Il chantun na sappia betg simplamain surprender ils custs, sche la Confederaziun midia insatge. Tuttina, Räber na vul betg dar si. Ses plan è da mobilisar deputadas per lantschar ina moziun en il Cussegl grond. Quella moziun duai empruvar da fixar en il budget dal chantun la contribuziun che manca en il futur.

RR actualitad mezdi 11:00