Chantun è cuntent - sindicats crititgeschan

La regenza grischuna è cuntenta cun la nova ordinaziun davart la lavur da dumengia. Ils sindicats èn però fitg skeptics. Il favrer 2014 aveva il Tribunal federal numnadamain dà raschun als sindicats che vulevan scumandar la lavur da dumengia sco en il center da cumprar "Designer Outlet" a Landquart.

Entrada en il vitget da butias dal Designer Outlet a Landquart. Bild in Lightbox öffnen.

Legenda da maletgs: La dispita per la vendita da la dumengia tranter il Designer Outlet a Landquart ed ils sindicats è para a fin. RTR, Telesguard

Pervi da la vendita da la dumengia en il Designer Outlet a Landquart era il sindicat Unia sa drizzà al Cussegl federal. Il sindicat aveva pretendi ch'il Cussegl federal duaja procurar ch'il chantun Grischun sa tegnia vi da la sentenzia dal Tribunal federal dal favrer passà. Lura aveva lez decidì che la vendita da dumengia a Landquart na correspundia betg a las perscripziuns.

Il cusseglier guvernativ Jon Domenic Parolini è sa mussa cuntent vers RTR. I saja bun ch'il Cussegl federal resguardia ils basegns dad avair ina vendita da la dumengia.

Schebain il center adempleschia propi las cundiziuns en l'ordinaziun ch'il Cussegl federal ha preschentà, saja quai anc da controllar, ha ditg Thomas Wepf dal sindicat Unia. Quel ch'aveva inoltrà tar il Cussegl federal da procurar ch'il chantun sa tegnia vi da la decisiun dal Tribunal federal.