Siglir tar il cuntegn

Header

vegl bain puril Zur Kante sper la Via da Masans a Curia
Legenda: Sch'i va tenor la citad duai il vegl bain puril «Zur Kante» far plaz a la Via da Masans. RTR, S. Degonda
cuntegn

Ulteriur Grischun Chasa «Zur Kante» sto far plaz a la Via da Masans

Quai almain sch'i va tenor la citad da Cuira. Ella less schlargiar la via per pudair far in vial da bus e da velos. Perquai sto il vegl bain puril vegnir stgarpà giu. Quai na plascha dentant betg a tuts.

L'uniun da la citad, l'uniun tetgala da las uniuns da quartier, vulcumbatter quai. Tenor ses president Peter Metz dettia quai er la pussaivladad da spustar la chasa.

Urs Marti, il president da la citad da Cuira, vesa quai auter. Tenor el fissi bler memia char da spustar e sanar la chasa. Che quai vegniss uschè char saja dentant la culpa da la citad è Peter Metz persvas. La chasa tutgia numnadamain a la citad, e cunquai ch'ella n'haja ils davos onns betg sanà la chasa vegniss quai uss uschè char.

Tenor Urs Marti hajan ins dentant sapientivamain betg investì en la chasa veglia perquai ch'ins quintava da baud ni tard stuair stgarpar giu la chasa «Zur Kante». La citad publitgescha uss la dumonda per stgarpar giu la chasa. Sa chapescha possia ins er far recurs encunter quai. Sche l'uniun da la citad fetschia recurs n'è betg cler, ins stettia en scadin cas en stretg contact cun la citad, uschia Peter Metz.

RTR/pb/ggf