Siglir tar il cuntegn

Header

Navigaziun

Legenda: Guardar il video Il museum d'art sin ils fastizs da la chatscha. Durada 02:54 minutas.
Or da Telesguard dals 20.06.2019.
cuntegn

Chatscha ed art Il museum d'art va sin ils fastizs da la chatscha

Sut il num «Passion» preschenta il museum a Cuira art ch'è vegnida inspirada da la chatscha.

A chatscha gieva Peter Egloff ch'el ha gì l'idea da far in'exposiziun davart la chatscha en l'art. La realisaziun da quest'idea è vegnida preschentada uss. «Passion» ha num l'exposiziun, curatada dal chatschader ed etnolog Peter Egloff ensemen cun il co-directur dal museum d'art e betg chatschadur Stephan Kunz.

Chatscha – in tema central en Grischun

La chatscha saja in tema central en Grischun. Perquai saja quai in bun tema per ina exposiziun, manegia Stephan Kunz. In focus spezial sin il Grischun na datti dentant betg.

Dals 22 da zercladur fin la fin d'october preschenta il museum ovras da 40 artists ed artistas da tut las epocas. Tranter da quels èn tant nums grischuns sco quels da l'artist Not Vital u da la cineasta Susanna Fanzun, sco er da quels dad iconas da l'art sco Pablo Picasso, Paul Klee, Kaspar David Friedrich u Chardin Jean Siméon.

Betg mussar mo la chatscha sco tala

Tenor Stephan Kunz ha la chatscha gia adina inspirà l'art. Ils emprims dissegns insumma sajan stads dissegns da chatscha. L'exposiziun tematisescha dentant anc dapli che la chatscha sco tala:

I na va betg per mussar 25 purtrets da chatschaders en il guaud, ma da mussar ils divers aspects, co che la chatscha ha influenzâ l'art.
Autur: Stephan KunzCo-directur dal museum d'art dal Grischun

La mort d'in animal, la nauscha conscienza u las trofeas sco simbol da status – dumondas che las ovras tematiseschan e che duessan er far studegiar ils visitaders.

RR actualitad 17:00