Siglir tar il cuntegn
cuntegn

Ulteriur Grischun Chattà successiun da Sieber e Bieler

Suenter las desditgas da David Sieber sco schefredactur da la Südostschweiz e da Larissa M. Bieler dal Bündner Tagblatt ha la chasa editura Somedia preschentà la successiun. Per David Sieber vegn Martina Fehr e per Larissa Bieler Luzi Bürkli.

Andrea Masüger, Martina Fehr, Luzi Bürkli e Hanspeter Lebrument
Legenda: Da san.: A. Masüger, Martina Fehr, Luzi Bürkli e Hanspeter Lebrument mad

Sco quai che la chasa editura Somedia communitgescha, hajan il cussegl d'administraziun e la direcziun da l'interpresa decidì da tschertgar ina schliaziun interna. Cun Fehr e Bürkli succedian dus collavuraturs da plirs onns en la posiziun da schefredactur.

Martina Fehr (40) lavura dapi 18 onns tar Somedia, quai en differentas posiziuns. Dal 2006 fin il 2012 ha ella lavurà sco manadra da la redacziun e pli tard sco manadra da program da Radio Grischa e Radio Engiadina (oz Radio Südostschweiz).

Luzi Bürkli (41) lavura dapi 19 onns tar Somedia, quai dentant cun interrupziuns. El è stà redactur tar Radio Grischa, redactur e producent da la «Bündner Zeitung», redactur da l'intern e da l'extern tar la Südostschweiz e pli tard manader dal ressort regiun. Dapi il schaner lavura Bürkli puspè sin la redacziun dal Bündner Tagblatt.