Siglir tar il cuntegn

Header

La citad da Cuira.
Legenda: Las mesiras da spargn han gì success: Cuira preschenta il 2015 in surpli da 11,5 milliuns francs. Keystone
cuntegn

Ulteriur Grischun Citad da Cuira: Sanaziun da finanzas sin buna via

Las mesiras da spargn dals ultims onns portan fretgs. La citad po preschentar il meglier resultat dapi l'onn 2008.

La citad da Cuira annunzia per l’onn passà in surpli da 11,5 milliuns francs. Quai tar entradas da 247,7 milliuns francs ed expensas da 236,2 milliuns francs. Sco la citad scriva, saja quai cumpareglià cun il budget in augment da 10,9 milliuns francs e cumpareglià cun l’onn avant per 8,3 milliuns francs.

Il surpli saja surtut d’attribuir a las mesiras da spargn dals ultims onns, scriva la citad da Cuira. Las investiziuns dals ultims onns sajan tuttas vegnidas fatgas cun agens meds finanzials.

Per ils onns proxims sajan plirs projects en la fasa da planisaziun e quests projects basegnian gronds meds finanzials.

PS malcuntenta cun il quint

En vista al quint 2015 pretenda la partida socialdemocratica da la citad da Cuira ina fin da las mesiras da spargn ed in budget pli realistic. Cuira ha fatg l'onn passà in gudogn dad 11,5 milliuns francs enstagl da 700milli sco budgetà.

La citad dovria implants da sport extraordinaris, ina biblioteca moderna e dapli canortas d'uffants pitschens.

Plinavant pretenda la PS da Cuira che la suprastanza budgeteschia en l'avegnir pli realistic sias entradas per uschia porscher al parlament ed a la populaziun ina basa pli vardaivla per prender decisiuns politicas.

RR novitads 11:00

cdm/um