La votaziun dals 25 da november duai esser la basa per che quest project turistic po vegnir realisà: Lura sto la populaziun votar davart ina midada da zona ed approvar in contract en dretg da construcziun tranter las pendicularas e la vischnanca.
Il plan: Sin il grond areal da parcadi a Claustra vitg, che vegn actualmain duvrà da las pendicularas Claustra-Madrisa, duessi dar in grond resort da famiglias. Il vitg da vacanzas cun in hotel e pliras chasas da vacanzas duess porscher var 550 letgs.
La vischnanca sustegna il project
Per la vischnanca è il project «Ober Ganda» in fitg bun project. Quest resort sappia dar nov schlantsch al turissem a Claustra, ch'è stà airi ils ultims onns, di il suprastant Florian Thöny: «Nus spetgassan radund 55'000 pernottaziuns ad onn».
La responsablad per il project n'è dentant betg tar la vischnanca, ma tar las pendicularas Claustra Madrisa. Las pendicularas èn perquai a la tschertga d'in investur che vegniss da purtar ils custs da radund 40 milliuns francs.
Sco emprim ston ils votants e las votantas dentant acceptar ils 25 da november las midadas necessarias per insumma pudair realisar il project. La radunanza da burgais ha gia ditg gea al project, quai cun 58 cunter 7 vuschs.
RR actualitad 12:10