Siglir tar il cuntegn

Ulteriur Grischun Cleras decisiuns en il Cussegl grond evangelic

Il Cussegl grond evangelic dal Grischun ha approvà duas fusiuns da plaivs refurmadas: La Corporaziun evangelica Ardez-Ftan-Guarda e la fusiun da Zernez/Brail, Susch e Lavin a la Corporaziun evangelica da Zernez.

purtret da trais persunas, dus umens ed entamez ina dunna
Legenda: La suprastanza reelegida (da san.): Frank Schuler, Barbara Hirsbrunner, Andreas Thöny mad

Plinavant han ils preschents reelegì la suprastanza dal cussegl da la baselgia, Andreas Thöny, Barbara Hirsbrunner e Frank Schuler.

«Las finanzas sajan en urden» ha ditg il cusseglier da la Baselgia evangelica refurmada dal Grischun e deputà dal Cussegl grond, Christoph Jaag, ed ha preschentà in quint equilibrà. Tar ina svieuta da 11,5 milliuns francs ha la Baselgia evangelica dal Grischun ha ella fatg in gudogn da 34'000 fr.

Discussiun a la fin

Ina viva discussiun hai dà en connex cun ina proposta da Fred Schütz, che vul reglar a moda pli flexibla l'obligatori da domicil dals commembers da suprastanza d'ina plaiv. Suenter plirs votums, per gronda part da represchentants da la plaiv evangelica da Cuira, ha il parlament decidì cun 61 cunter 6 vuschs e 4 abstenziuns da suandar la proposta da Frank Schuler. Lez ha ditg ch'i saja da tractar il tema, quai dentant en connex cun la revisiun da la constituziun che stat avant porta. Quai che pertutgia Cuira e l'elecziun dispitaivla da la presidenta da plaiv (Carmen Dasoli-Peter), saja da spetgar la decisiun da la cumissiun da recurs.

RR novitads 21:00