Co e cum - L’impurtanza ed ils privels dal vitamin D - Novitads

Co e cum L’impurtanza ed ils privels dal vitamin D

Durant l’enviern hajan sur la mesadad dals Svizzers in spievel da Vitamin D memia bass. L'ormon che noss corp producescha sez entras l’irradiaziun dal sulegl è fitg impurtants per nus – ma daco atgnamain?

Autur: Ronja Muoth

Grazia al vitamin D vegnia dapli calzium prendì or da quai che nus mangiain, ed uschia vegn era deponì dapli calzium en noss’ossa e lezza vegn pli ferma. Ma era ils musculs profitan dal calzium. Vinavant saja quai bun per il sistem d’immunitad e per las cellas, sco che pliras funtaunas en l'internet scrivan.
Vitamin D na po dentant betg vegnir cumpensà cun la vivonda. Ins sto star a sulegl senza crema da sulegl sin la pel, per che lezza sappia producir il vitamin D. Tenor l’Organisaziun mundiala da la sanadad tanschian 15 minutas per di durant la stad. Ma durant l’enviern na saja betg pussaivel da tancar avunda sulegl en Svizra.
Pli gugent dapli che memia pauc vitamin D – NA! Sch’ins ha memia bler vitamin D, per exempel cun prender aditivs alimentars, pon ins sa tissientar. Il spiel da calzium memia en il sang po causar deposits da calzium en ils gnirunchels – enfin insuffizienza dals gnirunchels. Dal vitamin D ch’il corp producescha sez pon ins betg sa tissientar.