Nus avain discurrì cun il president da la fundaziun Christian Collenberg. Nus avain guardà sur las spatlas a dunna Maria Giger da la spitex ed avain fatg ina visita a dunna Doris Mögling ch’abita en ina da las abitaziuns.
Adina dapli abitaziuns
Las abitaziuns dattan la segirtad ch'ins haja la tgira ed il service ch'ins dovra sch'ins vul e sa betg far tut sez. Quai di Christian Collenberg, il president da la fundaziun purtadra dal Kantengut. L’onn 1981 ha il Kantengut inaugurà las emprimas abitaziuns cun accumpagnament. Oz datti en l'instituziun dapli abitaziuns che letgs da tgira. Per Christian Collenberg in svilup che mussa il futur. Dentant vesa el era tschertas differenzas tranter la situaziun en la citad da Cuira e sin la terra.
Il temp ed il tablet
Dunna Maria Giger lavura passa 26 onns sco collavuratura da spitex en la chasa da tgira Kantengut. Ella accumpogna las abitantas ed ils abitants en las abitaziuns per attempads. Dentant be quels che dovran ses agid. Blers fan tut sez. Auters dovran in pau agid per il tegnairchasa. Ed anc ad auters sto Maria Giger gidar a star si e trair en soccas. Ils servetschs prestads ston las collavuraturas da la spitex documentar en minutas e secundas sin l’i-pad. Temp per discurrer cun las abitantas ed ils abitants resta tuttina.
Gia adina vivì en ils auts
Doris Mögling ha 83 onns e stat en ina da las abitaziuns cun accumpagnament dal Kantengut. Anc fa ella tut sez. Ed er il pum d'urgenza ha ella anc mai stuì duvrar. Sia abitaziun dad ina stanza sa chatta sin il terz e cunquai pli aut plaun dad ina da las quatter chasas cun abitaziuns. Quai è impurtant per Doris Mögling. Avant da vegnir en il Kantengut, ha ella vivì en ina chasa auta a Cuira, sin il 17avel plaun.
En l'actualitad da mezdi dal Radio Rumantsch pudais vus tadlar in'ura tematica davart l'abitar accumpagnà.
La discussiun politica davart la tgira da malsauns
Il chantun Grischun less midar la lescha per promover la tgira da persunas malsaunas. Tenor il manader da l’Uffizi da sanadad chantunal Rudolf Leuthold vulan ins tegnair quint cun la revisiun a la midada demografica. E perquai preveda il sboz da stritgar las contribuziuns per crear novs letgs da tgira. Persuenter duessan furmas alternativas d’abitar vegnir promovidas.
La critica
Durant la fasa da consultaziun han diversas organisaziun crititgà ed er refusà il sboz per reveder la lescha da malsauns. Tranter auter er la Regiun Surselva che va d’accord da promover dapli l’abitar accumpagnà. Dentant crititgescha la Regiun Surselva ch’ils custs vegnian spustads a las vischnancas ed als attempads cun la revisiun da la lescha.