La baselgia refurmada Son Gion a Schiers è sut protecziun. En vista a la renovaziun previsa ha la regenza decidì quest pass. La baselgia è vegnida construida ils onns 1519 fin il 1522 ed il chor posseda anc oz l'oriund arvieut a rait da la gotica tardiva.
La regenza n'ha però betg mess sut protecziun l'equipament da l'intern. Gist quai crititgescha la protecziun da la patria. L'equipament intern saja tenor in'expertisa degn da proteger. Ella appellescha a la plaiv da Schiers da tschertgar schliaziuns che rendian quint a la valur dal monument architectonic.