A Parpan han ils giuvenils trenà en il champ da musica, a Sursaissa ed a Tavau han els concertà. Tranter ils giuvenils è ina persuna vegnida testada positiv sin il coronavirus, quai suenter ch'il champ ed ils concerts èn stads a fin.
Il medem mument è er ina persuna ch'è stada al concert a Tavau ed è positiva per il coronavirus s'annunziada. Quai independent dal giuvenil ch'ha sunà.
Consequenzas
Per Sursaissa han omadus cas naginas consequenzas. A Tavau percunter èn 36 persunas vegnidas en quarantina. Perquai ch'il concept da segirtad ha funcziunà a moda exemplarica, èn las persunas pertutgadas vegnidas orientadas, di Michael Straub, il scrivent communal da Tavau.
Tenor il concept da segirezza eran ils aspectaturs vegnids registrads cun num ed els èn sesids en secturs separads in da l'auter. Era las sutgas eran tschentadas uschia, ch'i ha gì distanza tranter en. Straub spera che cun quellas mesiras hajan ins pudì evitar ch'i dettia dapli cas d'infecziun. Quai vegnia dentant a sa mussar en paucs dis, ha el manegià.
