Cun il slogan «Metter enturn la cunvegna da clima senza sperdita da confort» è vegnì fatg attent sin l'eveniment en il Partenz. Organisada è l'occurrenza en emprima lingia da l'Agentura solara da la Svizra.
Ord in clavau in edifizi energia plus
Grüsch n'è betg stà per cas il lieu d'occurenza. Là sa chatta numnadamain il biro da fatschenta spezial da la firma Züst. Oriundamain in clavà è el vegnì transfurmà en in edifizi energia plus.
Fitg spezial vid l'edifizi da trais auzadas è ch'el ha drizzà las installaziuns solaras sin tetg ost-vest e betg sco usità vers sid. Quai cun raschun: oz dettia quai megliers resultads che quai ch'ins aveva sperà avon diesch onns.
Jau na hai betg laschà m'influenzar da calculaziuns da l'ETH.
I na tanscha betg cun viver ecologic
Las sfidas pervi dal stgaudament dal clima sajan grondas – il potenzial però era. Uschia vesa Gallus Cadonau grond potenzial en l'electromobilitad:
Sch'ins prenda il surpli d'energia ch'in edifizi energia plus producescha e metta quai en il traffic, lura pon ins spargnar 85% da las emissiuns da CO2.
A Grüsch è uschia era il club da Tesla stà preschent cun radund 20 autos. Ils visitaders han gì la pussaivladad da seser en in auto e far ina girada. Medemamain è la Repower sa preschentada cun in stan, nua ch'ella ha declerà, tge ch'ella fan en connex cun staziuns da chargiar electromobils.
Exchavaturs electrics
Anc pli lunsch van intgins students da l'ETH. Els na vulan betg mo producir e charrar ecologic, mabain è bajegiar las chasas senz'emissiuns da CO2. A Grüsch èn els stads preschents cun in exchavatur electric ed han mussà, co ch'ins po bajegiar ecologic en il futur. In plus dals exchavaturs electrics: els fan bler pli pauca canera ch'in exchavatur ordinari.
RR actualitad 07:00