Siglir tar il cuntegn

Header

Lucas Lombriser avant la tavla da paraid.
Legenda: Lucas Lombriser ha era ina tavla da paraid en ses biro en l'Universitad da Genevra. MAD
cuntegn

Cosmologia In sguard en la vita da l’astrofisicher Lucas Lombriser

Il professur Lucas Lombriser da Trimmis raquinta, tge ch’in astrofisicher fa uschia l’entir di e da las sfidas da la vita da famiglia.

Lucas Lombriser è professer a l’Universitad da Genevra. Dentant è tegnair prelecziuns la pitschna part da sia lavur dal mintgadi. Il bler sa fatschenta l’um da 37 onns cun sia atgna retschertga. El ha sez projects, nua ch’el emprova da schliar problems da l’univers ensemen cun in team da circa tschintg persunas. Pli exact sa fatschenta Lucas Lombriser cun la cosmologia.

Quai è scienza davent dal «big bang» fin oz. El emprova da chattar las leschas fisicalas che descrivan il svilup da l’univers fin oz e da chattar ora, tge che l'energia e la materia stgira èn. Quai na sa numnadamain anc nagin propi.

E quai fa el cun formular ipotesas e far quints vid computers sco era vid sia gronda tavla naira sco en ils films.

La natira na lascha betg dictar co ch'ella haja da funcziunar. Ella funcziunescha sco ch'ella vul e nus avain da chattar ora quai.
Autur: Lucas Lombriserastrofisicher a l'Universitad da Genevra

Il Premi Nobel

Il Premi Nobel vegn surdà oz als onurads a Stockholm en la Svezia. Il Premi Nobel en fisica lez han gudagnà quest onn dus Svizzers, Michel Mayor e Didier Queloz. Els han chattà l’emprim exoplanet. Ils dus astrofisichers da l’Universitad da Genevra partan il premi cun il Canadais Jim Peebles. Lez lavura en la sparta da la cosmologia, exact sco Lucas Lombriser. Lucas Lombriser di, che grazia a Jim Peebles saja la cosmologia betg pli ina dumonda religiusa, mabain ina scienza natirala.

Lavur a Genevra, famiglia en il Grischun

Schegea che Lucas Lombriser è fieu e flomma per sia lavur datti er in punct negativ. Sia dunna ed ils dus uffants pitschens abiteschan en il Grischun. Els hajan dentant ponderà quai bain, e sajan sa decidids da star datiers dals geniturs d’omadus. La dunna da Lucas Lombriser lavura numnadamain sezza sco igienicra da dents.

En quella branscha na datti betg bleras plazzas e lura prendas quella ch’è libra.
Autur: Lucas LombriserProfessur a l'Universitad da Genevra

Anecdotas

Natiralmain che la dumonda tge ch’el tegnia da serias sco «The Big Bang Theory» na dastga betg mancar. E Lucas Lombriser manegia che la seria saja autentica e fatga bain, dentant magari er in zichel exagerada. Ed en quest mument vegnia endament ad el in'anecdota:

Cura che jau hai studegià en la California, è mia dunna vegnida a ma visitar. Lura essan nus ed anc in pèr collegas da mai ids ad Hawai en vacanzas. E mia dunna è sa divertida da vesair mes collegas a la bella splagia a Hawai vid scriver furmlas matematicas en il sablun.
Autur: Lucas Lombriser

Ord l'Archiv:

video
Lucas Lombriser cumprova teoria da Einstein
Or da Telesguard dals 04.06.2018.
laschar ir

RTR actualitad 08:00