Andreas Thiel - umor dispitaivel
Andreas Thiel è in dals pli enconuschents satirichers svizzers. El è in um dispitaivel, tals ins bainvis e tals auters malvis. Tranter auter pervi da ses umor.
Jau ri sur da tut quai che deprimescha, è trist e brutal.
Andreas Thiel è ina persuna che dat en ureglia ed en egl. En egl cun ses irokes, che mida adina puspè colur ed en ureglia pervi da ses pleds critics envers il mund. Uschè spezial sco sia persuna è era ses umor.
Il satiricher Thiel ha publitgà in cudesch dal umor ed ha era deditgà ses nov program da comedy al umor.
Andrea Zogg e Beat Schlatter - crear umor
Umor è quasi il mintgadi dals acturs e cabarettists Beat Schlatter ed Andrea Zogg. Cun quai ston els savair cura che nus stuain rir. Però cun inventar pointas na san ins mai sch’ils aspectaturs vegnan a rir u betg. Garanzia na datti nagina.
Var 9 da 10 pointas elavuradas procuran per in rir.
E da rir na datti betg bler cun crear umor. Quai saja ina lavur fitg pretensiusa. Il pli impurtant per crear e preschentar umor saja en mintga cas ch’ins stoppia sez rir da las sgnoccas. Ed impurtant, sche betg, ina premissa centrala è da pudair rir da sa sez. Beat Schlatter ed Andrea Zogg stattan per il mument ensemen sin il palc cun il teater da comedy «Polizeiruf 117».
Crear umor è ina chaussa fitg setga.
Il festival dad umor ad Arosa ha lieu sin 2000 meters sur mar. Il festival dura dals 3 enfin ils 13 da december 2015.