Siglir tar il cuntegn
cuntegn

Ulteriur Grischun Crudada da crappa en val Scalära

Sper la citad da Cuira en ina val laterala èsi vegni tar crudada da crappa. Actualmain è la polizia vi da sclerir sche umans èn pertutgads – uschia ha confermà Magnus Rageth da l'Uffizi da guaud e privels da la natira sin dumonda da RTR.

Google mpas dal territori.
Legenda: La val Scalära tranter Cuira e Trimmis marcada cun cotschen – dal lieu exact da la crudada da crappa na datti anc naginas indicaziuns. Google maps.

La crudada da crappa è stada en la val Scalära al cunfin da las vischnancas da Cuira e Trimmis, para saja era stà da vesair ina nivla da pulvra. Sinaquai hajan pliras persunas telefonà a la polizia chantunala, scriva l'agentura da novitads svizra SDA suenter avair discurrì cun il pledader da la polizia Martin Walser.

La crappa saja sa distatgada da las spundas dal Montalin, in piz da 2'266 meters autezza gist sper Cuira.

Auter che chasas da vacanzas na dettia quai nagut en la vallada, la polizia sclereschia uss ensemen cun l’uffizi per guaud e privels da la natira la situaziun. Enfin ussa na sappian els betg dapli, citescha l'agentura da novitads il pledader da la polizia.

Privel da bovas enconuschent

Gia l’onn 1964 aveva il chantun construi in batschigl per retgnair il material che pudess vegnir or da la val Scalära tar la uschenumnada «Scalärarüfe». En il medem batschigl sbucca er la «Maschänserrüfe».

Per tegnair en frain bovas da questas duas vals aveva il chantun realisà il 2005 per 2,5 milliuns francs in batschigl grond, scriva el en la publicaziun da l’Uffizi da construcziun bassa Nr. 65 l’onn 2005.

Screenshot da l'infurmaziun da l'uffizi da construcziun bassa.
Legenda: In extract or da la publicaziun (2005) da l'Uffizi: Il project 2005 per salvar las lingias da traffic en la val dal Rain da bovas ord las vals sur Trimmis. Screenshot TBA, Nr. 65 (2005)

Quel batschigl ha da proteger las lingias da traffic principalas en la Val dal Rain, illustrescha la fotografia correspundenta en la publicaziun da l'uffizi:

Screenshot.
Legenda: La situaziun tranter Trimmis e Cuira, tenor la publicaziun da l'Uffizi da construcziun bassa da l'onn 2005. TBA, Nr. 65 (2005)

Dapli suonda.

RR novitads 17:00