Siglir tar il cuntegn
cuntegn

Ulteriur Grischun Cuira-Bellinzona senza fermada

Durant las proximas 3 emnas porscha l'AutoDaPosta SA mintga di ina colliaziun directa da Cuira a Bellinzona ed enavos. Il curs direct è bunamain ina mesa ura pli svelt ch’ils curs regulars.

Autos da Posta a Cuira.
Legenda: Da Cuira fin a Bellinzona senza fermada. Keystone

A partir da questa sonda fin ils 21 d'october porscha AutoDaPosta mintga di a las 08:53 ina colliaziun directa davent da Cuira cun arrivada a las 10:43 a Bellinzona. L' auto da posta direct per turnar a Cuira parta lura a las 17:17 davent da Bellinzona. Il temp da viadi sa reducescha cun il curs direct per 29 minutas – cumpareglià cun ils curs regulars.

Cun questa fasa da test duai vegnir examinà, sche la clientella giavischa questa purschida. Èn ils resultats da la fasa da test positivs, vegn il curs direct cun la proxima midada d'urari 2018/19 prendì si en l'urari regular.

Reservaziun obligatorica

Sco er ils ulteriurs curs per Bellinzona, sto il viadi cun l'auto da posta direct vegnir reservà. Il pli cumadaivel san ins far quai online. Sco alternativa èsi però er pussaivel da reservar per telefon sut il numer 058 341 34 87.

RR novitads 15:00