Siglir tar il cuntegn

Header

cuntegn

Ulteriur Grischun Cuira - co enavant cun il bajetg da la posta?

La fin da quest onn vegn serrada la posta en il bajetg dalla posta a Cuira. La citad da Cuira vul plazzar la biblioteca da la citad en las localitads che daventan libras. Sche quel plan sa vegnir realisà uschia n' è dentant anc betg segir.

Cun la biblioteca da la citad plus vul la citad da Cuira fusiunar las bibliotecas ch'eran fin uss decentralas, sco per exempel la biblioteca Aspermont u la biblioteca Arcas.

audio
Bunura: Cuira – dapli raps per la biblioteca
ord Actualitad dals 18.05.2016.
laschar ir. Durada: 1 minuta 58 Secundas.

Als 5 da zercladur voteschan ils da Cuira, sche la citad duai augmentar la contribuziun annuala a la fundaziun da la biblioteca da la citad da 490'000 francs sin maximalmain 1,089 milliuns.

Gia il mars aveva il parlament da Cuira approvà sin proposta dil cussegl dalla citad da fusiunar las bibliotecas. Previs èsi da plazzar la biblioteca en il bajetg dalla posta. Per renovar las localitads survegniss la biblioteca dalla citad anc in credit d' investiziun da 2,2 milliuns francs.

In bajetg - plirs interessents

Igl n'è dentant anc betg segir sche las bibliotecas dastgan vairamain midar chasa en il bajetg da la posta. In contract da locaziun cun la Crédit Suisse che posseda las localitads n' exista numnadamain anc betg: «Actualmain essan nus anc en tractativas cun la possessura», declera Markus Frauenfelder, il scrivant da Cuira.

audio
Bunura: Cuira – pro e contra dapli raps per la biblioteca
ord Actualitad dals 18.05.2016.
laschar ir. Durada: 3 minutas 17 Secundas.

La citad da Cuira n'è dentant betg suletta. Sco che Andreas Roth da la Crédit Suisse di, datti atualmain plirs interessents per las localitads dalla posta. Tgi che dastga finalmain fittar las localitads vegnia communitgà il pli baud la mesadad da quest onn.

RR actualitad 08:00

Artitgels legids il pli savens