Il mardi avantmezdi è ina camiunetta cun charr annex collidada cun in vehichel da signalisaziun. Il manischunz è sa blessà levamain.
Tenor la polizia chantunala era il manischunz da 36 onns sin via cun sia camiunetta sin il vial sid da l'autostrada sper Cuira. Radund dus kilometers avant la sortida Cuira sid era in plazzal temporar per lavurs da mantegniment. Il plazzal era sin il vial normal e segirà entras in camiun cun signalisaziun. Lez ha manà il traffic sin il vial da surpassar. Il manischunz da la camiunetta è collidà cun quest camiun che steva airi ed è charrà nuncontrolladamain sur omadus vials vers sanester e collidà cun la saiv directiva a mez l'autostrada. Suenter la collisiun è la camiunetta cun charr annex sa fermada. In'ambulanza ha transportà l'um levamain blessà en l'ospital chantunal a Cuira.
L'impediment da traffic ha durà fin las 14:30 uras. Il traffic è per part vegnì svià tras la citad. Il donn material munta a radund 100'000 francs.