Siglir tar il cuntegn
cuntegn

Ulteriur Grischun Cuira crescha e duess crescher vinavant

Areguard da las ponderaziuns tar la strategia economica per las regiuns grischunas «Agenda 2030» ha Urs Marti, president dal marcau da Cuira, dà in sguard en il futur da la citad.

Panorama da Cuira.
Legenda: L'onn 2030 savess Cuira avair 4'000 enfin 6'000 abitants dapli. Tenor Urs Marti fiss quai supportabel. Keystone

Betg mo il Grischun dil nord crescha surproporziunalmain, er la citad da Cuira sezza. Oz ha ella radund 37'000 abitants, en l'onn 2030 savess Cuira avair 4'000 enfin 6'000 abitants dapli. Quai fiss supportabel, di Urs Marti. Schizunt 45'000 abitants pudessia la citad vertir.

Quant fitg che la citad crescha mintg'onn, dependia da dus factura: Per l'ina dal dumber da immigrants, per l'autra dal dumber da glieud che vegn ord las valladas en il center a habitar. Marti giavischass dapli glieud giuvna, perquai che be cun glieud giuvna sappia la citad prosperar. Plazzas da lavur dessi numnadamain avunda. Cunzunt glieud qualificada ed era emprendists manchian a las firmas grischunas.

E per tut ils novs lavurants dessi er avunda platz per abitar. Cuira stoppia dentant plitost baghegiar novas abitaziuns en l'ault, el lad na detti betg pli uschè bler platz. Che tut sa drizzi dentant el west cun il nov quartier ed il nov center d'administraziun «sinergia» dal chantun na tema Urs Marti dentant betg. Ils biros che vegnian vits el center da la citad sajan garantì spert puspè dai a fit.

In'ulteriura pussaivladad che Cuira creschiss en in plum per pliras millis persunas fiss, sche la vischnanca da Cuira fusionass cun las vischnancas el conturn. Marti beneventass las discussiuns tar ina tala fusiun.