Siglir tar il cuntegn

Ulteriur Grischun Cuira: Directur da scola Jann Gruber va

Las scolas da la citad da Cuira han da magunar bleras midadas tar il persunal. Sper midadas tar l'integraziun da la structura dal di per uffants e tar la lavur sociala en scola, datti era midadas en la direcziun da las scolas. Regularas e surprendentas.

purtret jann gruber
Legenda: Il directur Jann Gruber banduna la direcziun da las scolas da Cuira cun ils 22 da december. mad

L'emprim d'avust 2013 ha Jann Gruber surpiglià il post dal directur da las scolas da Cuira. Ussa banduna el quel post. Quai surprendentamain e quasi per immediat. Sco quai che Cuira communitgescha banduna Gruber la direcziun cun ils 22 da december – tenor la citad en enclegientscha vicendaivla. Las raschuns sajan differentas ideas davart la cultura da manar e las prioritads en las fatschentas operativas.

Era il vicedirectur Reto Thöny banduna la direcziun da las scolas da Cuira. Il favrer 2018 va el en pensiun suenter 40 onns lavur en las scolas da la citad en differentas funcziuns – dapi il 2005 sco vice-directur.

Actualmain marschan pli gronds projects a Cuira. D'ina vart marscha l'introducziun dal plan d'instrucziun 21, da l'autra vart èsi dad integrar la structura dal di per uffants e la lavur sociala sco partiziuns separadas en la direcziun da scola. Quai aveva il cussegl communal decis il zercladur passà e la cumissiun da furmaziun planisà.

RR novitads 06:00