Siglir tar il cuntegn

Header

audio
Saira: Bunas novas per Inventx
Or da Actualitad dals 15.01.2020.
laschar ir. Durada: 1 minuta 55 Secundas.
cuntegn

Cuira Dretgira dat glisch verda per bajetg nov da la Inventx SA

La Dretgira administrativa grischuna lubescha il nov bajetg da fatschenta en il lieu da l'anteriur lavuratori forestal a Cuira.

Sche la decisiun na vegn betg tratga avant la proxima instanza, duai dar en il bajetg novs plazs da lavur da IT per radund 200 persunas.

Il matg 2017 aveva il suveran da Cuira approvà cun ina maioritad da bunamain 85% da dar a l'interpresa Inventx (interpresa spezialisada sin tecnologia da finanzas) il terren da l'anteriur lavuratori forestal en dretg da construcziun. La Inventx vul construir en quest lieu in nov bajetg da fatschenta cun abitaziuns ed ina halla da parcar sutterrana.

Per nus è quai ina fitg positiva e legraivla novitad. Uss mirain nus ch’ì giaja vinavant e che nus possian prest cuntanscher cun la badigliada il proxim pass decisiv.
Autur: Patrick Hagen CFO da Inventx

Retard da bunamain trais onns

Plirs recurs da vischins han entardà l'entir project. Cunter la lubientscha da bajegiar da la citad il favrer 2018 hai dà recurs avant la Dretgira administrativa.

in plazzal
Legenda: Qua duai dar la nova chasa da fatschenta da Inventx. RTR, Hugo Schär

Ils bajetgs da l'anteriur lavuratori èn gia daditg spazzads ed er il terren è sanà. Contaminaziuns da tissis da l'anteriura fabrica da gas sin quest areal han stuì vegnir dischmess. La parcella è pia pronta dapi bainbaud dus onns per insatge nov.

Per cuvrir il basegn da plaz creschent ha la Inventx prendì a fit la remisa veglia da locomotivas sco schliaziun transitorica. Actualmain occupescha l'interpresa 250 collavuraturas e collavuraturs, da quai 170 a Cuira.

La decisiun da la Dretgira administrativa n'ha anc betg la vigur legala. Aifer 30 dis pon ins far recurs avant il Tribunal federal.

RTR novitads 15:00

Artitgels legids il pli savens