Siglir tar il cuntegn
cuntegn

Ulteriur Grischun Cuira è led da la «Chur Card»

Suenter l'emprima sesiun da far bogn en la Obere Au cun la «Chur Card» tira il president da la citad da Cuira, Urs Marti, in bun fazit. Introducir la Chur Card haja mussà, che bunamain tuttina bleras persunas indigenas sco persunas d'ordaifer tiran a niz il bogn.

survista da l'areal Obere Au
Legenda: Cun la «Chur Card» pajan indigens damain; glients d'ordaifer Cuira pajan dapli vi dals custs da l'infrastructura da l'entir areal da la Obere Au a Cuira. Keystone

Per il president communal Urs Marti è quai la conferma ch'i saja stà gist da far la "Chur Card". Cun questa paja mintga abitant da Cuira il pretsch usità per ir a far bogn. Persunas dad ordaifer pajan 30% dapli. Cun auzar il pretsch per persunas d'ordaifer vul la citad reparter pli gist ils custs. Betg mo ils abitants da Cuira duain surpigliar custs e debits, mabain tut las persunas che fan niz da las offertas.

Strusch critica

Critica haja il president survegnì pauca dapi l'introducziun da la "Chur Card" l'entschatta da matg. Quai malgrà che las vischnancas dal conturn da Cuira n'eran a l'entschatta betg intgantadas da las tarifas pli autas. I saja fair e chapibel che la citad lessia reparter auter ils custs, haja Urs Marti udì da bleras persunas. Quai ha ditg Marti vers il "Regionaljournal Graubünden" da SRF.

Actualitad la bunura 06:00