Siglir tar il cuntegn

Header

video
In GEA per la colliaziun directa da Cuira si Brambrüesch
Or da Telesguard dals 19.05.2019.
laschar ir. Durada: 2 minutas 13 Secundas.
cuntegn

Cuira: GEA tar Brambrüesch «In resultat grondius» di Urs Marti

Cun passa 55% GEA (6'400 cunter 5'124 vuschs) è sa decidì il suveran da Cuira per ina colliaziun directa Cuira–Brambrüesch – il president da la citad, Urs Marti, ha gust.

Ils da Cuira tegnan vi da lur pendiculara: Els concedan ina contribuziun d'investiziun da passa 24 milliuns che pussibilitescha da realisar uss ina colliaziun directa da la chapitala si Brambrüesch. La participaziun a la votaziun è stada tar radund 48%.

Plan da las duas pussaivladads a Brambrüesch.
Legenda: La populaziun decida, sch'els vulan remplazzar la pendiculara veglia (alv) cun ina colliaziun directa (cotschen). RTR

Il president da la citad da Cuira, Urs Marti, sa mussa fitg cuntent – i saja numnadamain in resultat grondius. Cun ina pendiculara pli moderna sajan garanti er ils da Cuira puspè motivads dad ir si Brambüesch:

Sche mintga abitanta u abitant da Cuira va si duas giadas ad onn è il deficit davent.
Autur: Urs Marti president da la citad, Cuira

Quai fiss fitg bel, di Mario Cortesi da la PPS Cuira, che n'ha betg sustegnì il project. Dapli ch'in unic lift na dettia quai dentant tuttina betg sisum Brambrüesch.

audio
Las reacziuns dal victur Urs Marty – ed il perdent Mario Cortesi:
ord Actualitad dals 19.05.2019.
laschar ir. Durada: 2 minutas 17 Secundas.

La colliaziun directa duai garantir:

  • ina colliaziun sperta en 8 minutas – enstagl dad uss var 17 minutas
  • nagina midada pli entamez il traject, sin il «Känzeli»
  • in'investiziun gronda per dal bun – suenter ils passa 24 milliuns restan ils custs sco enfin uss tar circa 1 milliun francs ad onn

Il suveran suonda cun sia decisiun a la suprastanza da Cuira: Per Tom Leibundgut, cusseglier da la citad ed en quella funcziun er president da las pendicularas Brambrüesch Chur Dreibündenstein eri cler, che la colliaziun directa saja la meglra varianta per colliar Cuira cun Brambrüesch.

Cunter quest'idea era s'exprimida en emprima lingia la PPS. Per ses president da fracziun Mario Cortesi avessi fatg da basegn da preschentar anc almain in'ulteriura varianta. La colliaziun directa saja memia luxuriusa.

RR novitads 14:00++

Artitgels legids il pli savens