Curt e concis:
- La citad da Cuira ha fatg 26,2 milliuns francs gudogn l'onn passà.
- Il gudogn è sa sminuids per 1 milliun francs envers l'onn avant.
- Per il tschintgavel onn en seria ha Cuira pudì finanziar tut cun agens daners.
La chapitala grischuna po danovamain nudar in bun onn finanzial. Tar entradas totalas da 272 milliuns ha Cuira fatg l'onn passà in gudogn da 26,2 milliuns francs - 24 milliuns dapli che budgetà. Sco quai che la citad communitgescha, hajan en spezial las valitaziuns da parcellas ed immobiglias sco er pli autas entradas da taglia contribuì fitg al grond gudogn.
Gia il 5avel onn en roda ha la citad pudì finanziar tut sias investiziuns ord atgna forza. Dapi il 2015 è l'agen chapital da Cuira creschì per 102 milliuns francs.
Spargnar vinavant è la devisa
Era sche la citad da Cuira ha pudì spargnar na vegn il pe da taglia betg sbassads per il proxims onns, manegia il president da la citad da Cuira Urs Marti. I saja anc d'investir bler ils proxims onns e per la realisaziun da quests projects vul la citad esser pronta. Tar quels tutga tranter auter la realisaziun dal project «Eisball», las lavur vid las pendicularas Brambrüesch u er il transfer da l'armada svizra da la caserna al Rossboden. Tut en tut vegn la citad da Cuira ad investir ina mesa milliarda ils proxims 10 onns.
