Siglir tar il cuntegn

Header

Navigaziun

Pendiculara da Brambrüesch che parta da la staziun aval.
Legenda: Il parlament da la citad da Cuira sustegna la colliaziun directa a Brambrüesch. RTR, Hugo Schär
cuntegn

Ulteriur Grischun Cuira: Parlament da citad sustegna nova pendiculara

Il parlament da Cuira ha decidì la gievgia da sustegnair la finanziaziun da la colliaziun directa a Brambrüesch per 24,4 milliuns francs.

Il politicher verdliberal, Jürg Kappeler, ha proponì d'agiuntar a la summa d'investiziun la remartga che quella possia variar vers ensi ed engiu per 25%. Quai cun l'idea da far pli transparent ils custs a la populaziun che decida ils 19 da matg a l'urna davart la pendiculara nova. Il parlament ha approvà questa proposta.

Vuschs criticas hai cunzunt dà nà da las partidas da dretga PBD e PPS sco er dals Liberals che han proponì da refusar il messadi. Tranter auter cun ils arguments ch'i saja da preschentar al pievel dapli che mo ina varianta ed er dad elavurar in meglier concept da manaschi. Discussiuns hai surtut er dà davart la cundiziun, che las pendicularas ston augmentar lur chapital d'aczias da 2 sin 4 milliuns francs, sco segirtad per l'investiziun da la citad. Quella cundiziun resta dentant.

La finala ha il parlament approvà il messadi cun 11 cunter 8 vuschs tar ina abstenziun.

Ulteriuras decisiuns

Il parlament ha er approvà la midada da la furma d'organisaziun da la GEVAG en in'organisaziun dal dretg public. Plinavant ha il parlament er ditg GEA ad in credit per renovar la «Steinbockstrasse» en ina zona d'inscunter pli attractiva. Il «Haus zum Arcas» na vegn betg vendì. Il project «Haus der Chöre» ed il teater «Zapperlot» pon uschia ir en il bajetg istoric.

RR novitads 17:00