Avant bun in onn ha la citad da Cuira instradà midadas en il sistem da la scola bilingua. Dapi quest onn da scola è vegnì fatg ord sis classas da mintgamai duas annadas tschintg classas. Sch'in uffant va pia en la scola bilingua a Cuira èsi pussibel ch'el vegn en ina classa cun trais annadas u en ina cun duas annadas.
Educaziun ineguala?
La midada ha chaschunà quitads e malaveglia, cunzunt tar ils geniturs. Il matg haja la fracziun da la PCD dal parlament communal da Cuira dà per incumbensa a la citad d'examinar e proponer novas mesiras concretas per meglierar la situaziun. Plinavant han els pretendì dad examinar la pussaivladad da puspè introducir sis classas per la scola primara rumantsch-tudestga.
Jau sun dal avis ch'ils uffants na vegnan tras quai betg tractads egual e quai na dastga betg esser.
Il cussegl da la citad ha fatg in rapport tar l'incumbensa. Quel era dentant pauc cuntentaivels per la PCD. Il cussegl da la citad propona numnadamain al parlament da stritgar l'incumbensa.
Jau sun dal maini ch'ils uffants n'èn betg dischavantagià. En la scola bilinguas è il nivel dals scolars fitg auts. I dat autras incunvegnientschas en las scolas ch'èn pli grondas ed existan gia pli daditg.
Tenor Patrick Degiacomi vegniss la situaziun actuala reponderada, sch'il dumber da scolars restass pli stabils e sch'i na dess naginas fluctuaziuns. L'autra gievgia vegn l'incumbensa ed il rapport tractà en il parlament da Cuira. Lura decidan ils deputads tge che capita cun las classas bilinguas.