Siglir tar il cuntegn
Inhalt

Ulteriur Grischun Cuira procura era per transparenza

Il parlament da la citad ha approvà cleramain la nova lescha da transparenza. 14 deputads han ditg gea, e sis èn s’abstegnids da la vusch.

Fatschada da glas d'ina chasa auta
Legenda: Il principi da transparenza vala dapi il 1. da november en Grischun, uss suonda la citad da Cuira. Keystone

Limità la transparenza en l’administraziun vuleva il deputà liberaldemocrat Dominik Infanger, sco la gasetta «Südostschweiz» scriva. El ha postulà in mussament da l’interess, per evitar che persunas dumondian invista en actas or da spir marveglias. Quai saja gea grad l’idea da la nova lescha, da pussibilitar in access ad actas senza gronds obstachels. Uschia ha respundì Jean-Pierre Menge ch’aveva dà il stausch per la nova lescha.

Transparenza gratuita

La nova lescha da transparenza da la citad da Cuira procura che documents uffizials daventan accessibels. Finamira è da promover la transparenza dals acts da l’administraziun, ed uschia dar la pussaivladad a la publicitad da controllar l’administraziun. Dumandar actas è gratuit.

Excepziuns per tschertas firmas

Betg suttamess a la transparenza en firmas sco la Stadtbus Cuira SA, la fundaziun Teater Cuira e la Societad da construcziun da la citad da Cuira WSC. La raschun è che quellas firmas lavuran en concurrenza cun autras firmas senza dretgs exclusivs.

RR novitads 08:00